എൻ എൻ സ്മാരക യു പി സ്കൂൾ ആലക്കാട്/ചരിത്രം
| സ്കൂൾ | സൗകര്യങ്ങൾ | പ്രവർത്തനങ്ങൾ | ക്ലബ്ബുകൾ | ചരിത്രം | അംഗീകാരം |
ദേശീയ പ്രസ്ഥാനവും കർഷക പ്രസ്ഥാനവും സാമൂഹിക സാംസ്കാരിക വിദ്യാഭ്യാസ മണ്ഡലങ്ങളിൽ വമ്പിച്ച മാറ്റങ്ങൾ ഉണ്ടാക്കി .ഇതിൻെറ അനുബന്ധമായി ആരംഭിച്ച സാക്ഷരതാ, വിദ്യാഭ്യാസ പ്രവർത്തനം എന്നിവ ഈ വിദ്യാഭ്യാസ സ്ഥാപനം സ്ഥാപിക്കുന്നതിന് കാരണമായി .ലോവർപ്രൈമറി വിദ്യാഭ്യാസത്തിനുശേഷം ഉപരിപഠനത്തിനായി കരിവെള്ളൂർ മാന്യഗുരു ഹയർ എലിമെൻററി സ്കൂളിനെയും പയ്യന്നൂർ ബോർഡ് ഹൈസ്കൂളിനെയും ആണ് പ്രധാനമായും ആശ്രയിച്ചിരുന്നത്. വർധിച്ച തോതിലുള്ള ഫീസും യാത്രയ്ക്കുള്ള അസൗകര്യങ്ങളും ഉപരിപഠനത്തിന് തടസ്സം സൃഷ്ടിച്ച സാഹചര്യത്തിൽ സാമൂഹിക വിദ്യാഭ്യാസ മണ്ഡലങ്ങളിൽ കർമ്മനിരതനായ നാരായണൻ മാസ്റ്റർ സ്വയം പ്രചോദിതനായി 1938 ഡിസംബർ 15 നു ആറാംതരമായി ഈ വിദ്യാലയം ആരംഭിച്ചു .1941 ഓടെ ഒരു പൂർണ്ണ യുപി സ്കൂളായി ഉയർന്നു .
ഈ നാടിൻെറ വ്യത്യസ്ത ഭാഗങ്ങളിൽ നിന്നും മാത്രമല്ല സമീപ ഗ്രാമങ്ങളിൽനിന്ന് പോലും വിജ്ഞാന സമ്പാദനത്തിനായി വിദ്യാർത്ഥികൾ എത്തിയിരുന്നു. അതുകൊണ്ടുതന്നെ ഈ സ്ഥാപനത്തിൻെറ വളർച്ചയും അതിവേഗം ആയിരുന്നു. വിദ്യാഭ്യാസത്തെ ഒരു വ്യവസായം ആക്കുകയും ആഗോളവൽക്കരണത്തിൻെറ തന്ത്രം ഈ മേഖലയെ ഒരു വിൽപ്പനച്ചരക്കാക്കി മാറ്റുകയും ചെയ്യുന്ന ഇന്നത്തെ ഇന്ത്യൻ സാഹചര്യത്തിലും പതിറ്റാണ്ടുകൾക്കുമുമ്പ് നാരായണൻ മാസ്റ്റർ അനുഷ്ഠിച്ച സ്തുത്യർഹമായ സേവനം ജനലക്ഷങ്ങളുടെ ഹൃദയത്തിൽ ഹരിതാഭം ആയിത്തന്നെ ഇന്നും നിലനിൽക്കുന്നു. ഈ സ്ഥാപനത്തിൻറെ സ്ഥാപക ഹെഡ്മാസ്റ്റർ എന്ന നിലയിൽ അദ്ദേഹം നൽകിയ അധ്യാപക -അധ്യാപന മൂല്യങ്ങൾ സഹപ്രവർത്തകരെയും വിദ്യാർത്ഥികളെയും ആവേശം കൊള്ളിക്കുന്നതായിരുന്നു .ഈ വിദ്യാലയത്തിലെ പ്രവർത്തനത്തോടൊപ്പം തന്നെ നിശാപാഠശാല, വായനശാല എന്നിവയുടെ പ്രവർത്തനവും ഏറ്റെടുത്ത് നടത്തുന്നതിൽ അദ്ദേഹം കാണിച്ച പാടവം അസൂയാവഹം ആയിരുന്നു .ഈ പ്രവർത്തനങ്ങളിലൂടെ സാധാരണ ജനങ്ങളെ പുരോഗമന പ്രസ്ഥാനങ്ങളുമായി അടിപ്പിക്കുന്നതിൽ അദ്ദേഹം കാണിച്ച പ്രവർത്തനശൈലി തികച്ചും അനുകരണീയവും മാതൃകാപരവും ആയിരുന്നു .എങ്കിലും നിക്ഷിപ്ത താല്പര്യക്കാരുടെ ചൊൽപ്പടിക്ക്നിൽക്കാതെ പ്രവർത്തന രംഗങ്ങളിൽ സധൈര്യം നടത്തിയ ചെറുത്തുനിൽപ്പ് സ്ഥാപിത താൽപര്യക്കാരെ എത്രമാത്രം പിണക്കി എന്നത് പിൽക്കാല സംഭവങ്ങൾ തെളിയിച്ചു .
1941 മാർച്ചിൽ സ്കൂൾ നടത്തിപ്പോന്ന ഓലമേഞ്ഞ താൽക്കാലിക ഷെഡ് തീവെച്ച് നശിപ്പിച്ചു .കത്തുന്ന തീയിൽ നിന്നും സ്കൂൾ റെക്കോർഡുകൾ എടുത്തുമാറ്റാൻ കഴിഞ്ഞത് നാട്ടുകാരുടെ അവസരോചിതമായ പ്രവർത്തനത്താൽ ആയിരുന്നു. പ്രബുദ്ധരായ നാട്ടുകാരുടെ സഹായത്തോടെ അടുത്ത അധ്യയന വർഷത്തിന്റെ ആരംഭത്തോടെ പുതിയ സ്കൂൾ കെട്ടിടം ഉണ്ടാക്കാൻ സാധിച്ചു എന്നത് പ്രത്യേകം പ്രസ്താവ്യമാണ്.
1948 സ്കൂളിൻറെ ചരിത്രത്തിൽ കറുത്ത അധ്യായം എഴുതിയ ചേർത്ത് വർഷമായിരുന്നു .കമ്മ്യൂണിസ്റ്റ് സമരങ്ങളുടെ ഭാഗമായി ആലക്കാടും പരിസരത്തും നടന്ന സമരത്തിൽ പങ്കെടുത്ത നേതാക്കന്മാരെയും ജനങ്ങളെയും ക്രൂരമായ പോലീസ് മർദ്ദനത്തിനും നരനായാട്ടിനും വിധേയമാക്കി.ഇതിന്റെ ഭാഗമായി നാരായണൻ മാസ്റ്ററെയും വിഷ്ണു നമ്പീശൻ മാസ്റ്ററെയും സ്കൂളിൽ വെച്ച് തന്നെ പോലീസ് അറസ്റ്റ് ചെയ്ത് ക്രൂരമായി മർദ്ദിക്കുകയും 41 മാസം ജയിലിലടക്കുകയും ചെയ്ത സംഭവം പുതിയതലമുറയ്ക്ക് വാമൊഴിയും വരമൊഴിയും ആണെങ്കിലും പഴയ തലമുറയിൽ പെട്ടവർ ഹൃദയത്തിൽ സൂക്ഷിക്കുന്ന മായാത്ത ചരിത്രസത്യമാണ്. തുടർന്ന് നാരായണൻ മാസ്റ്ററുടെ സർട്ടിഫിക്കറ്റ് റദ്ദ് ചെയ്യുകയും അദ്ദേഹത്തിന് അയോഗ്യത കല്പിക്കുകയും ചെയ്തു. സ്വാതന്ത്ര്യാനന്തര ഭാരതത്തിൽ ആണ് ഈ സംഭവം നടന്നത് എന്നത് നമ്മെ ലജ്ജിപ്പിക്കുന്നു .
ഈ പ്രതിസന്ധിഘട്ടത്തെ തരണം ചെയ്തു സ്കൂൾ നിലനിർത്തേണ്ടത് നാട്ടുകാരുടെയും അധ്യാപകരുടെയും കടമയായി മാറി .അതുവഴി സ്കൂൾ മാനേജ്മെൻറ് അദ്ദേഹത്തിൻറെ ഭാര്യ ശ്രീമതി കെ ജാനുഅമ്മയ്ക്ക് കൈമാറി. സ്കൂൾ നിലനിർത്തുന്നതിൽ അധ്യാപകരായിരുന്ന ശ്രീ കെ .പി..കുഞ്ഞിക്കണ്ണൻ നായരും ശ്രീ പി.കെ.ദാമോദരൻ നമ്പ്യാരും വഹിച്ച പങ്ക് അഭിനന്ദനീയവും സ്മരണീയവുമാണ് .
1981ൽ നാരായണൻ മാസ്റ്റർ ജയിൽമോചിതനായി സർട്ടിഫിക്കറ്റ് കിട്ടിയ അദ്ദേഹം 1951ൽ ഒക്ടോബർ മുതൽ വീണ്ടും ജോലിചെയ്തു തുടങ്ങി .1974 മാർച്ചിൽ സർവീസിൽ നിന്ന് റിട്ടയർ ചെയ്യുന്നതുവരെ ഈ സ്കൂളിൻെറ പ്രഥമാധ്യാപകൻ അദ്ദേഹമായിരുന്നു .പയ്യന്നൂർ ഏരിയയിലെ ഒരു മാതൃക അധ്യാപകനും സാമൂഹിക - സാംസ്കാരിക പ്രവർത്തകനുമായ നാരായണൻ മാസ്റ്റർ 1989ൽ അന്തരിച്ചു. അദ്ദേഹത്തിന്റെ സ്മരണാർത്ഥം സ്കൂളിന് നാരായണൻ നായർ സ്മാരക യുപി സ്കൂൾ (N.N.S.U.P.SCHOOL)എന്ന് പുനർനാമകരണം ചെയ്തു .ഈ സ്കൂളിന്റെ കീർത്തിക്കും യശസ്സിനും വേണ്ടി ഇത്രമാത്രം ത്യാഗം ചെയ്ത നാരായണൻ മാസ്റ്ററുടെ ഓർമ്മയ്ക്ക് മുൻപിൽ ആദരാഞ്ജലികൾ.