ചെറു കാറ്റലകൾക്കു പോലുമേ
കടപുഴകി വീഴ്ത്താമെന്നായിരിക്കുന്നു
ചുവന്ന പനിനീർ മലരിനേക്കാൾ മുള്ളുകൾ
സമ്മാനിക്കുന്ന ചുവപ്പൊരിഷ്ടമായി തീർന്നിരിക്കുന്നു
നിറക്കൂട്ടുകൾ വാരി ചാർത്തിയ പൂവിലും
പൂമ്പാറ്റയിലും ആകൃഷ്ടമാകാതെ മനസ്സ്
കരിഞ്ഞുണങ്ങിയ പുൽനാമ്പുകളെ തഴുകുന്നു
പുഴയുടെ കളകളാരവമെത്ര അലോസരമാണ്
വറ്റി വരണ്ട പുഴയോരത്തിരുന്നു
കഥ മെനയാ൯, കവിത ചൊല്ലാ൯ തോന്നുന്നു
സൂര്യോദയമെത്രയോ കണ്ടു മടുത്തിരിക്കുന്നു
അസ്തമയത്തെ മാത്രമുറ്റു നോക്കുന്ന
മഴ പെയ്യുന്നുവെങ്കിൽ പേമാരി മതി
നിലയ്ക്കാത്ത പേമാരി
മിഴി തോരാതെ പെയ്യട്ടെ
ഉള്ളിലുയരുന്ന തേങ്ങലുകൾ
മഴാരവത്തിലലിഞ്ഞു
പൊട്ടിച്ചിരിയുടെ അലകളുയർത്തട്ടെ
