2022-23 கல்வி ஆண்டு

ஜூன் 1 - நுழைவு விழா

"சுமை இல்லா புத்தகப்பை வேண்டும்

சுவையான பாடங்கள் வேண்டும்

அடிக்காத ஆசிரியர் வேண்டும்

செடியோடு பேச வேண்டும்

இனிமையான நண்பர்கள் வேண்டும்

என்ற கனவோடு பள்ளிக்கு வந்த குழந்தைச் செல்வங்கள்."

கேரளா அரசாங்க அறிவிப்பின்படி ஜூன் ஒன்றாம் தேதி பள்ளிகள் மீண்டும் திறக்கப்பட்டது. பள்ளிக்கு வந்த மாணவ மாணவியரை இன்முகத்தோடு வரவேற்று மலர் கொத்து கொடுத்து கிரீடம் அணிவித்து எம் மாணவச் செல்வங்களை பள்ளிக்கு அழைத்து வந்தோம். பள்ளிக்கு வந்த எம் மாணவர்களை வாழ்த்தி வடகரபதி கிராம பஞ்சாயத்து தலைவர் திரு ஜோஷிபிரிட்டோ நல்வாழ்த்து கூறி அன்போடு அவர்களை வரவேற்றார். மாணவர்களுக்கு இனிப்பு கொடுத்து உற்சாகப்படுத்தினோம்.

ஜூன் 5 - சுற்றுசூழல் தின விழா

நமது சுற்றுச்சூழலுக்கு நாம் செய்த தவறுகளையும், அதை எல்லாம் சரி செய்ய நாம் செய்ய வேண்டிய கடமைகளையும் இந்த நாள் நினைவூட்டுகிறது. இயற்கையை நாம் இணைந்து பாதுகாப்போம் உலக சுற்றுச்சூழல் தின வாழ்த்துக்களோடு.

எம் பள்ளி மாணவ மாணவிகளோடு வேர்ல்ட் விஷன் இணைந்து மரம் நடும் விழா.

போடு காய்கறி தோட்டம் போடு

நம் பள்ளிக்கு தேவையான காய்கறி தோட்டம் போடு.

நம் பள்ளி மாணவ-மாணவியர் ஆசிரியர் உதவியோடு பள்ளிக்கு தேவையான காய்கறிகளை தோட்டம் அமைத்து நடவு செய்கின்றனர்.

ஜூன் 22 - பெற்றோர் ஆசிரியர் பொதுக்குழு கூட்டம்

ஒவ்வொரு மாதமும் எங்கள் பள்ளியில் பெற்றோர் ஆசிரியர் சங்கக் கூட்டம் நடைபெறுவது உண்டு இதில் அம்மாதம் முழுவதும் குழந்தைகளுக்கு கற்பிக்கப்படும் கற்றல் நோக்கங்களையும், எவ்வாறு கற்றல் அடைவுகளை மேம்படுத்தலாம் என்றும் பெற்றோரும் ஆசிரியரும் இணைந்து முடிவு செய்யப்படுகிறது.

ஜூலை 1 - வாசிப்பு தினம்

ஆசானாய் கோலின்றி கோபமின்றி போதிக்கும்!

தேடுதல் தந்திடும் தேட விடாது

தவறேல்லாம் திருத்தும் வன்சொல் சொல்லாது!!

என் உலகயிருக்கும்

மனிதரே இன்றி போனாலும்

புத்தகம் ஒன்றே போதும் உற்ற நண்பன் போலாகும் ...

எங்கள் பள்ளியில் நடந்த வாசிப்பு தின விழாவில் பள்ளியின் முன்னாள் மாணவரும் இன்றைய கிராம்பாறை துவக்கப்பள்ளி ஆசிரியருமான திரு.ரவி அவர்கள் மாணவர்களுக்கு புத்தக வாசிப்பின் அருமையை மிகச் சிறப்பாக கதைகள் மூலம் விளக்கிக் கூறி பள்ளிக்கு தேவையான சில நல்ல நூல்களையும் வாங்கித் தந்து எங்கள் பள்ளி மாணவர்களை உற்சாகப்படுத்தினார்.

ஜூலை 2 - ஓவிய போட்டி

பள்ளி மாணவர்களுக்கான ஓவியப்போட்டி. எம் பள்ளியின் முன்னாள் மாணவியும் இந்நாள் முத்தூட் பேங்க் வங்கி அதிகாரியுமான திருமதி லதா அவர்கள் மூலம் ஏற்பாடு செய்யப்பட்ட ஓவியம் வரைதல் போட்டியில் எங்கள் பள்ளி மாணவர்கள் கலந்துகொண்டு சிறப்பு பரிசுகளை பெற்றனர்.

ஆகஸ்ட் 15 - சுதந்திர தின விழா

செப்டம்பர் 2 - ஓணப் பண்டிகை

"சிதறிய பூக்களை தூவி விட,

சிதறாமல் இருக்கிறது.

அழகு கொண்ட கோலங்கள்

உளி கொண்டு செதுக்க வில்லை.

விரல் நுனியில் செதுக்கியிருக்கிறார்கள்

எம் பள்ளி மாணவ-மாணவிகள்."

எங்கள் பள்ளி மாணவ-மாணவிகளின் ஓண பூக் கோலங்கள் கோலங்கள்.

ஓவிய போட்டி

எங்கள் பள்ளியின் தாளாளர் எங்கள் பள்ளி மாணவ மாணவிகளை உற்சாகப்படுத்தும் விதமாக ஓவியப் போட்டியை நடத்தினார். இதில் பங்குபெற்ற மாணவ மாணவிகள்.

செப்டம்பர் - ஆரோக்கிய உணவு விழிப்புணர்வு ஊர்வலம்

உண்போம் உண்போம் பச்சைக் காய்கறிகளை உண்போம்.

உண்போம் உண்போம் பழங்கள் கீரைகள் உண்போம்.

தவிர்ப்போம் தவிர்ப்போம் பாக்கெட் உணவுகளை தவிர்ப்போம்.

துரித உணவு விரைவில் சாவு!

இவ் விழிப்புணர்வு வாசகங்களோடு எங்கள் பள்ளி மாணவ-மாணவிகள் சாலையில் நடந்து பொதுமக்களுக்கு விழிப்புணர்வு ஏற்படுத்தினர்.

மேலும் என் பள்ளியில் பயிலும் மாணவ மாணவிகளும் பணிசெய்யும் ஆசிரியர்களும் துரித உணவுக்கு எதிரான உறுதி மொழியை எடுத்தனர்.