സെന്റ് തോമസ് മിഷൻ എൽ.പി.എസ് എരിമയൂർ/ചരിത്രം
1928 എരിമയൂരിൽ ഒരു പ്രാഥമിക വിദ്യാലയം റവ.പി ജോൺ വർഗീസ് (പാലക്കാടച്ചൻ) തലവടി ശ്രീ .പി .വി .എബ്രഹാം എന്നിവർ അധ്യാപകരായി വടക്കുമ്പ്രത്ത് ചാൾസ് വില്യം മകനായ വി. സി മാധവൻ ഉണ്ണിയുടെ സ്ഥലത്ത് ഒരു ചെറിയ ഓലഷെഡിൽ ആരംഭിച്ചതാണ് ഈ സ്കൂൾ .ആദ്യം 10 കുട്ടികൾ മാത്രമാണ് ഉണ്ടായിരുന്നത്. മാതാപിതാക്കൾക്ക് കുട്ടികളെ സ്കൂളിൽ അയക്കാൻ തീരെ താത്പര്യമില്ലായിരുന്നു. തുടർന്ന് മല്ലപ്പള്ളിയിൽ നിന്ന് ശ്രീ.റ്റി.വി. ജോൺ സാർ വരികയും സ്കൂളിന്റെ ചുമതല ഏറ്റെടുത്ത് നടത്താൻ തുടങ്ങി .
വളരെ ത്യാഗവും പട്ടിണിയും സഹിച്ചാണ് ഈ സ്കൂളിന് വളർത്തിക്കൊണ്ടുവന്നത്. ശ്രീ . ചാൾസ് വില്യം സ്കൂൾ പണിയുന്നതിനും അച്ചനും സഹോദരന്മാർക്കും താമസിക്കുന്നതിനും കെട്ടിടം പണിയുന്നതിനുള്ള സ്ഥലം സംഭാവന ചെയ്യുകയും ചെയ്തു. സ്കൂൾകെട്ടിടം ഉണ്ടായ ഉടൻ തന്നെ ആദ്യത്തെ നാല് ക്ലാസ്സുകൾക്ക് സർക്കാർ അംഗീകാരം നൽകി.
ആരംഭംമുതൽ ഈ സ്കൂളിന് അതിശക്തമായ എതിർപ്പുകളെ അഭിമുഖീകരിക്കേണ്ടി വന്നു . മതപഠനം നടത്തുന്ന എന്ന കാരണം പറഞ്ഞ് 1936 വിദ്യാലയത്തിന് അംഗീകാരം പിൻവലിച്ചു. എന്നാൽ വിദ്യാഭ്യാസ ഡയറക്ടർ സ്കൂൾ സന്ദർശിച്ച് വസ്തുനിഷ്ഠമായ അന്വേഷണം നടത്തിയപ്പോൾ പരാതിക്കാരുടെ ആരോപണത്തിൽ സത്യമല്ലെന്ന് വ്യക്തമായി സ്കൂളിന് വീണ്ടും അംഗീകാരം ലഭിക്കുകയും ചെയ്തു.
വിദ്യാഭ്യാസത്തിൽ വന്ന കാലോചിതമായ മാറ്റങ്ങൾ ഉൾക്കൊണ്ട് കുട്ടികളുടെ സമഗ്ര വികസനത്തെ ലക്ഷ്യമാക്കി പ്രവർത്തനങ്ങൾ ക്രമപ്പെടുത്തുന്ന രീതിയാണ് ഞങ്ങൾ അവലംബിക്കുന്നത്. സ്നേഹസമ്പന്നനായ പാലക്കാടച്ചന്റെ ത്യാഗനിർഭരമായ പ്രവർത്തനങ്ങളിലൂടെ വളർന്നു വന്ന ഈ മഹത്തായ സ്ഥാപനത്തെ നിലനിർത്തുന്നതിനും പരിപോഷിപ്പിക്കുന്നതിനും പ്രഗത്ഭരായ ഒട്ടേറെ പേരുണ്ട്. ത്യാഗനിർഭരമായ പ്രവർത്തനങ്ങളെ നന്ദിയോടെ സ്മരിക്കുന്നു. വിദ്യാഭ്യാസത്തെ കച്ചവടമാക്കി മാറ്റി കൊണ്ടിരിക്കുന്ന ഈ കാലഘട്ടത്തിൽ ലാഭേച്ഛ കൂടാതെ ജാതിമതഭേദമന്യേ എല്ലാ തരത്തിലുള്ളവർക്കും വിദ്യാഭ്യാസം നൽകുവാൻ കഴിയുന്നുവെന്നുള്ളതാണ് ഈ സ്ഥാപനത്തിന്റെ പ്രത്യേകത. സേവന തല്പരരും അർപ്പണബോധവുമുള്ള ചെറുപ്പക്കാരായ അധ്യാപകരും സ്കൂളിന്റെ നന്മ ലക്ഷ്യമാക്കി പ്രവർത്തിക്കുന്ന പി. ടി. എ യും സ്ഥാപനത്തിന്റെ മുതൽക്കൂട്ടാണ്.494 കുട്ടികൾ പഠിക്കുന്ന നമ്മുടെ സ്കൂൾ ഇന്ന് മാർത്തോമ മാനേജ്മെന്റിലേയും കുഴൽമന്ദം സബ്ബ് ജില്ലയിലെയും ഏറ്റവും വലിയ എൽ. പി സ്കൂളാണ് എന്നതിൽ ഞങ്ങൾ അഭിമാനിക്കുന്നു.
150 ഓളം സ്കൂളുകളുള്ള എം ടി & ഇ എ കോർപ്പറേറ്റ് മാനേജ്മെന്റിൽ ഉൾപ്പെടുന്ന ഈ വിദ്യാലയത്തിന്റെ ഇപ്പോഴത്തെ മാനേജർ ശ്രീമതി. ലാലി കുട്ടിയും ഹെഡ്മിസ്ട്രസ്സായി ശ്രീ.സാം ജോയ് എൻ.എസ് പ്രവർത്തിച്ചു വരുന്നു.